Қачонлардир Тошкент кўчаларида трамвайлар ҳаракатланган. Баъзан қишда, ташқарида қор ёки ёмғир ёғаётган маҳал трамвайга чиқиб бўш ўриндиққа ўтирардик ва доим такрорланиб турувчи «тук-тук, тук-тук...» товушидан уйқуга кетардик. Агар биз учун трамвайлар ўтмишда қолган бўлса, кўпчилик шаҳарларда ҳозирги кунда ҳам трамвайлардан жамоат транспорти сифатида фойдаланиб келинмоқда. Хўш, келинг машҳур трамвай йўналишларини бир эслаб ўтсак!

Истанбул

Ким машҳур қизил трамвайни билмайди дейсиз? Бугун у ўзининг дастлабки вазифасини бажармайди, бироқ Тақсим майдони ва Тюннел ерости фуникулёри станцияси орасида ҳаракатланади. Трамвай фақат сайёҳларга хизмат кўрсатади ва Nostalgic Tram деб аталади.

Лиссабон

Сайёҳлар Португалия пойтахти бўйлаб тарихий № Е 28 трамвайида учишни ёқтиришади. Истанбуллик «ҳамкасбидан» фарқли ўлароқ, Лиссабон трамвайи ёрқин сариқ рангга бўялган. У Мартим Монишни Кампо-де-Оурике билан боғлайди ва сайёҳлар орасида шуҳрат қозонган Граса, Алфама, Байша ва Эштрела районларидан ўтади. Ушбу тиқирлайдиган ва ғижирлайдиган трамвайда сайёҳлар жон деб учишади. Айтишларича, у тор кўчаларга ўзгача зийнат беради ва шаҳарни тўлиқ томоша қилишга имкон яратади.

Гонконг

Агар Англияни икки қаватли автобусларсиз тасаввур қила олмасак, Гонконг бу борада ўз йўлини танлашга қарор қилди ва икки қаватли трамвайларни ўйлаб топди! Биринчидан, бу энг арзон жамоат транспортларидан бири. Иккинчидан, деярли барча тарихий районларни қамраб олади. Учинчидан эса, трамвайнинг ўзи диққатга сазовор обидадек, унинг ичида кўплаб сайёҳлар суратга тушишади.

Прага

Прагадаги 91-рақамли трамвай қизил рангда бўлиб, у ҳам тарихий ҳисобланади. Дам олиш кунлари у сайёҳларни Прага маркази бўйлаб айлантиради. Унинг бор-йўғи 2 вагони ва 45 та ўриндиғи мавжуд бўлиб, ундаги саёҳат пайтида Прага Гради қалъаси, Қироллик боғи ва Бельдевер, Малостран ва Вацлав майдонларини томоша қилиш имконияти бор.

Милан

Модалар пойтахти, ривожланган ва замонавий шаҳарда ҳам қадимийлик муҳитини яратишга қарор қилишди ва 1920–1930 йилларда қурилган тарихий трамвайларни йўлга қўйишди. Трамвай салони ёғочли, дизайн ҳам замонавий эмас. Бироқ айнан шу жиҳати унга кўрк бағишлаб туради!

Рио-де-Жанейро

Бу ерда трамвайларни муҳим сайёҳлик аттракционига айлантиришди. У Санта-Тереза деб номланади, сабаби Риони шу номдаги қояли район билан боғлаб туради. Унинг маршрути тор кўчалар бўйлаб ўтади. Трамвай дизайни аслига мос. Сариқ рангга бўялган, дераза ва эшикларсиз трамвай ҳаяжонга солади ва йўловчиларни бир аср орқага қайтаради.

Варшава

Бу трамвай тарихий эмас, балки отлидир. Ҳали рельслар яратилмаган пайтда Варшава бўйлаб омнибуслар – от кучи билан тортиладиган кўп ўриндиқли аравалар юрган. Бугун бундай омнибусларни тиклашди ва уларни отли трамвайлар деб аташади. Унда чиптачи бир вақтнинг ўзида экскурсия ўтказувчи ҳамдир, йўловчиларга эса аксарият ҳолларда мусиқачилар ҳамроҳлик қилишади!