...Истанбулни севиб қолиш учун шунчаки у ерга бориш кифоя! Тарих, диққатга сазовор обидалар, кўнгилочар томошалар, харидлар ва албатта, таом!!! Турк ошхонаси шубҳасиз энг ширин ва ранг-баранг ошхоналардан биридир: гўштли, хамирли таомлар, ширинликлар, мевали десертлар, ичимликлар... Бугун биз Сизга Истанбул стрит-фуди афсонаси, ўз ишининг ҳақиқий устаси Emin Usta (Марио) – Амин уста ҳақида ҳикоя қиламиз.

Бу эса биз – Севара ва Даврон Emin Usta билан биргаликда!

Ушбу истараси иссиқ ва очиқкўнгил, мўйловли ва бироз тўлачадан келган амаки дунёдаги энг ширин балиқли бутербродлар – балиқ экмак тайёрлашнинг ҳақиқий устаси.

Истанбулда уни топиш унчалик қийин эмас. Устанинг «иш жойи» – Галата кўприги ёнидаги сув бўйида. Эминёню қирғоғида балиқчилар ва сайр қилишга мўлжалланган кемалар ёнидан ушбу кўприкдан ўтасиз ва кўрфазнинг нариги томонида тушасиз. Кўприкнинг чап тарафида Сиз ҳар доим янги денгиз маҳсулотларини топишингиз мумкин бўлган Қоракуй балиқ бозорини кўрасиз. Соҳил бўйлаб балиқ сэндвичи усталарининг манқалларига кўзингиз тушмагунича кетаверинг. Emin Usta ни айнан шу ердан топасиз.

«Нега айнан Emin Usta?» – деб сўрарсиз. Дарҳақиқат, балиқли сэндвични арзон нархга кўприкда ҳам, кўприк тагида ҳам ва юз метр радиусдаги исталган сотувчида ҳам харид қилишингиз мумкин. Бироқ уларнинг ҳеч қайсисида бундай мазали сэндвич чиқмаса керак. Айтишларича, Амин соусга қандайдир сирли нарса қўшар, балиқ ва булғор қалампирини бошқача усулда қовурар, помидорларни ўзгача шаклда тўғрар эмиш! Натижада оддий сэндвич балиқ экмакка айланади ва ўзгача таъмга эга бўлади!

Миш-мишларга қараганда, таомга бетакрор таъмни берувчи нарса – оддий қизилмия ўсимлиги экан.

Emin Usta бу фикрни тасдиқламайди ва инкор этмайди ҳам. Шунчаки жилмайиб қўяди. Чунки бунинг асл сабабини ҳеч ким билмайди, барча тахминлар эса – шунчаки тахминлар!

Амин уста энди пайдо бўлган вақтларда унинг рақобатчилари: Нега у балиқ ва сабзавотларни лавашга ўраяпти? – деб унинг устидан кулишган ҳам эмиш. Бироқ мана 15 йилдирки, улар устанинг рецептини такрорлаш илинжида, аммо барчаси бесамар. Бошқа ҳеч ким бундай сэндвич ҳали ҳануз тайёрлай олмаяпти. Амин уста бўлса эндиликда Истанбулнинг ошпазлик ҳақидаги фильмларининг ҳақиқий юлдузи ва гастрономик сайёҳликни ёқтирувчиларнинг эркатойи. Уни «Орёл и решка. Перезагрузка. Стамбул» ва яна бошқа қатор кўрсатувларда намойиш қилишган.

Одатда, Амин устага катта навбатга турилади. Бироқ бу ҳеч кимни хавотирга солмайди. Биз унинг ёнига келганимизда, бахтимизга, одамлар унчалик ҳам кўп эмас эди. Шундай бўлса-да, чамаси 20 дақиқа навбатда туришимизга тўғри келди.
Бир дона балиқ 12 лира, яъни тахминан $ 4 туради.

Ҳа, айтганча!!! Бордию Сиз аччиқни ёқтирмасангиз, «Not spicy» дейишни унутманг!
Emin Usta нинг иши осон эмас. «Лекин, – дейди у, – асосийси, очиқ ҳавода ва одамлар билан биргаликда». У кўринишидан нимаси биландир матросни ҳам ёдга солади. Уста кўп ҳазиллашади, одамлар билан гаплашади ва ўз қилаётган ишини ниҳоятда севади. «Стрит-фуд арбоби», Истанбул юзи ва рамзи Emin Usta мана шундай инсон. У билан танишиб гаплашгач, Сиз албатта Туркияга қайтишни хоҳлаб қоласиз!

Ушбу очиқкўнгил, ўз ишининг илғори билан яна учрашиш, ундан ижобий қувват олиш ва албатта, дунёдаги энг яхши балиқ экмакни татиб кўриш учун Истанбулга боришнинг ўзи кифоя!