Италиянинг Тоскана вилояти ушбу мамлакат ҳақида оз бўлса-да тасаввурга эга бўлган инсонларга нотаниш эмас.

Бу минтақа асосан ўзининг тарихий шаҳарлари ва архитектура ёдгорликлари билан машҳур. Буларга, албатта, Пиза ва Флоренция, Сиена ва Сан-Жиминьянони мисол қилиб келтириш мумкин. Бироқ бугун гап шаҳарлар ҳақида эмас, Италиянинг энг машҳур ва йирик термал курорти Монтекатини-Терме ҳақида боради. Биз Сизларга Facebook ва Тelegram да турли курортлар ҳақида ҳикоя қилган эдик (айтганча, бизга обуна бўлиб, энг сўнгги янгиликлардан хабардор бўлиб борасиз), бироқ ушбу мўъжаз маскан ҳақида ҳали ёзмаганмиз.

Монтекатини-Терме шаҳри Римдан 320 км ва Миландан 283 км узоқликда жойлашган (иккала ҳолатда ҳам енгил автомобилда 3 соатдан ошиқроқ юрилади).

Курорт иқлими – нисбатан майин, Ўртаер денгизи минтақасига хос. Қишда у ерда 2–10 даражада илиқ атрофида, ёзда эса ҳарорат 20–22 гача кўтарилади. Шу боисдан меҳмонлар бу ерга даволаниш учун йил бўйи ташриф буюришади. Шундай бўлса-да, баҳор ва куз фаслларида дам олувчилар сони бошқа вақтлардагидан кўра кўпроқ!

Монтекатини-Терме Апеннин этагида, Ньеволе дарёси водийсида жойлашганлиги туфайли бу ернинг иқлими ниҳоятда майин ва ёқимли.

Ҳудуд ўзининг термал сувлари сабаб инсонларга фойдали бўлиши мумкинлигини антик даврда ҳам тахмин қилишган. Бироқ, манбаларга кўра, ҳаммом ва чўмиладиган жойлар бу ерда фақатгина 16 асрга келиб қурила бошланди. 19 асрда эса курорт аристократлар ва ижод аҳли вакиллари орасида шуҳрат қозонди. Адриано Челентано, Одри Хепберн, шаҳзода Ренье ва малика Грейс, Жузеппе Верди каби машҳур шахслар Монтекатини-Термеда дам олишни яхши кўришган ва ушбу курортда кўп марталаб бўлишган.

Шу вақт ичида бу ерда даволаш борасида қандай тажриба тўпланганини тасаввур қиляпсизми? Курортда ошқозон-ичак тракти, жигар ва буйрак, нафас олиш тизими, таянч-ҳаракат аппарати ва бошқа касалликлар даволанади.

Курортда асосан сув ва шифобахш лойлар билан даволанилади.
Бироқ аввал ташриф буюрувчиларни маслаҳат олиш учун маҳаллий мутахассисга юборишади ва у муолажалар тартибини белгилаб беради.

Термал сувларнинг номларини бир ўқиб кўринг! Ахир бу ҳақиқий итальян шеъриятику!

o Режина – жигар ва ўт пуфаги фаолиятини тиклаш учун.
o Туттуччо – жигарни тозалайди ва холестерин миқдорини камайтиради, шунингдек, гастритда ҳам фойдали.
o Леопольдина ошқозон муаммоларидан халос этишга ёрдам беради.
Леопольдина сувидан ЛОР-аъзолар касалликларини бартараф қилишга ёрдам берувчи ингаляциялар сифатида фойдаланилади.

Шунингдек, бу ерда бальнеологиянинг турли тадбирлари билан ҳам даволанилади: гидроуқалаш, термал ва соғломлаштирувчи ванналар, кўмир кислотаси ванналари ва ҳ.к. Буларнинг бари таянч-ҳаракат аппаратини даволаш ва янада соғломлаштириш мақсадида қилинади.

Монтекатини-Терме амалиётидан лой билан даволаш ҳам ўрин олган.

Даволаш қандай гўзал манзара қўйнида олиб борилишини тушунишингиз учун қуйидаги суратларга бир назар солинг!

Муолажалар орасида дам олувчилар Монтекатини-Терменинг диққатга сазовор жойлари – қадимги қалъалар, иморатларни томоша қилишлари мумкин бўлади.

Фаол даволанишни ёқтирувчилар учун – бассейнлар, ҳаммомлар, SPA, фитнес-заллар, теннис кортлари ва бошқалар мужассам.

Даволаниб бўлиб, шифокор кўрсатмаларини бир мартагина бузишни хоҳловчиларни Монтекатини-Термеда итальян ошхонасининг кўплаб ресторанлари кутмоқда. Аммо кафе ва ресторанлар у ерда асосан вегетериан ва парҳезбоп бўлиб, шинам ва таомлари ҳам мазали!

Монтекатини-Терме мана шулари билан диққатимизни тортди. Ушбу эртакнамо маскан ҳозирданоқ Сизни кутмоқда!