Малайзия –конституцион монархия давлати, кўпчилик сайёҳлар учун жозибали маскан ҳисобланади. Юқори сифатли хизмат кўрсатиш соҳаси ва миллий бойликлар – тропик ўрмонлар, мовий океан ва оппоқ қум туфайли ушбу давлатда дам олиш ҳаттоки энг талабчан сайёҳларни ҳам ўзига тортади. Малайзия нафақат ўзининг табиат бойликлари, балки ноёб архитектураси билан довруғ қозонган. Замонавий архитектура мўъжизасининг ёрқин мисоли – Куала-Лумпурда жойлашган кўкка интилган Петронас миноралари. Бу ерда қадимий Жамак ва Жайм масжидларини кўздан кечиришингиз, мамлакатдаги энг йирик индуизм ибодатхонаси – Шри Маҳариамман, бой Миллий музей ва сайёҳлар кўзини қамаштирувчи бошқа сон-саноқсиз архитектура ёдгорликларини кўришингиз мумкин.

Малайзия – фаол дам олиш учун кўнгилдагидек жой. Пинанг оролининг тоғли курортлари, миллий истироҳат боғлари, дайвинг-саргузаштлари билан ном қозонган Борнео ороли, таърифлаб бўлмас даражада мафтункор капалаклар боғи ва бошқа эътиборли жойлар сизни бефарқ қолдирмайди. Бу давлатнинг гўзаллиги мартдан сентябргача бўлган муддатда айниқса яққол намоён бўлади.

Малайзияга сафар – экстремал саёҳатдан тортиб денгиз қирғоғидаги сокин дам олишгача бўлган мавжуд барча ҳордиқ чиқариш усулларини ўзига қамраб олади.

Малайзияда саёҳат – бу тинчлантирувчи денгиз ҳавоси, сокин тўлқинлар, ёввойи ҳайвонлар, мегаполислардаги қайноқ ҳаёт ва чекка ҳудудлардаги ўзига хослик.